पोलिसांनी वाहनासह जप्त केले तंबाखू, आरोपीस अटक.
गडचिरोली:- सुगंधित तंबाखूची तस्करी होत असल्याची गुप्त माहिती मिळताच येथील पोलिस ठाण्यातील डीबी पथकाने सापळा रचून वाहनासह ३ लाख ७७ हजारांचा मुद्देमाल जप्त केल्याची कारवाई रविवारी दुपारी ३ वाजेच्या सुमारास आरमोरी मार्गावरील खरपुंडी नाक्यावर केली. यावेळी यशवंत विठ्ठल हर्षे (४१, रा. गिलगाव) याला ताब्यात घेण्यात आले. गिलगाव येथून कारद्वारे गडचिरोली शहरातील चिल्लर विक्रेत्यांना सुगंधित तंबाखू पुरवठा होणार असल्याची माहिती गडचिरोली पोलिस ठाण्यातील डीबी पथकाला मिळाली. या माहितीच्या आधारे डीबी पथकाने शहरातील आरमोरी मार्गावरील खरपुंडी नाक्यावर सापळा रचला. दरम्यान, एमएच ३३ – व्ही ५५६२ क्रमांकाची संशयित कार येताना दिसताच पथकाने सदर कारला थांबवून तपासणी केली असता, वाहनात २७ हजार रुपये किमतीचा सुगंधित तंबाखू आढळून आला. पोलिसांनी ३ लाख ५० हजार रुपयांची कार व सुगंधित तंबाखू, असा एकूण ३ लाख ७७ हजार रुपयांचा मुद्देमाल जप्त केला. याप्रकरणी यशवंत हर्षे याला अटक केली.
सदर कारवाई पोलिस निरीक्षक अरविंदकुमार कतलाम यांच्या मार्गदर्शनाखाली महिला सहायक पोलिस निरीक्षक पूनम गोरे यांच्या नेतृत्वात डीबी पथकाचे धनंजय चौधरी, स्वप्नील कुडावले, परशुराम हलामी, तुषार खोब्रागडे, वृक्षाली चव्हाण आदींनी पार पाडली.
